الخميس  28 آذار 2024
LOGO
اشترك في خدمة الواتساب

مواطن يصف لـ"الحدث" مشهدا من إحدى المستشفيات

2016-08-24 01:50:35 PM
مواطن يصف لـ
صورة تعبيرية

 

الحدث- طولكرم

 

وصلت اليوم رسالة لـ"الحدث" من أحد مواطني مدينة طولكرم، وصف فيها المواطن حادثة كان أحد شهود العيان عليها.

 

وهذا نص الرسالة كما وردت بلغة مرسلها:

 

"قصة صارت قدام عيوني وأنا بطوارئ مستشفى ثابت ثابت الحكومي/طولكرم..

كنت مرافق لابن خالتي اللي أجته إصابه وهو بالشغل بأراضينا المحتله.. وإحنا بنعاين فيه فجأه سمعنا إستغاثة غريبة كإنه جاي معها ملك الموت.. كلنا وجهنا نظراتنا لباب الطوارئ.. فتح الباب.. شباب بركضوا ومعهم ولد صغير عمره 5 سنوات.. من الارتباك رموه بحضن الدكتور.

الشباب: "دكتور مشان الله.. مات الولد.. مشاان الله".

الدكتور: "شو صار معه إشرحلي بسرعة "ومزع بلوزة الولد.. وحط عليه أجهزة فحص القلب والعلامات الحيوية".

واحد من الشباب اللي جابوه: "أبوه نزل من السيارة وتركه فيها، وبعدها الولد طلع راسه من الشباك وسكره عراسه، ورجع أبوه عالسيارة يمكن بعد 10 دقايق وبعدها جبناه هون".

كل اللي بالطوارئ: يااا رب.. ياااا الله..

ع كثر ما حضرت عمليات إنعاش للقلب بالطوارئ.. قدرت أحدد من شاشة الجهاز إنه القلب متوقف

الأطباء بلشوا يعملوا cpr " اللي هو انعاش القلب والرئة"

الدكتور: "أعطيني الأدرينالين بسرعة".

مضى 7 دقائق على عمل الأطباء.. بلشت أقرأ ع وجوهم الاستسلام.. سقطت دمعة من الممرضة وهي تساعد بالأطباء.

تأكدت أنه هالعصفور سافر عند ربنا..

خيم الصمت ع كل المكان.. كل الأطباء استسلموا وما بقي إلا صوت الدكتور اللي بيعمل ال cpr .

بوسط الهدوووووء القااااااتل.. رن الجهاااز.. الأطباء كإنهم ماتوا ورجعتلهم الحياة..

الجهاز: 34..

36..

47..

59..

الدكتور نزل بنطلون الولد ودخل بربيش بمجرى البول.. وصراحة ما بعرف سحب إشي والا أعطاه إشي.. بس حسب اعتقادي أعطاه لأنه عملية إخراج البول بتنزل الضغط.

بعد لحظات رجع العدد بالهبوط للثلاثين..

مش سامع إشي بالطوارئ إلا رنة الجهاز وكلمة يارب من كل الموجودين.

ومرة وحدة بلش الجهاز تدريجيآ يرسم عوجوهنا البسمة وكل العيون "رغرغت"

وصل الرقم ل73..

الدكتور: "بسرعه عال ICU "وحدة العناية المكثفة""

سحبوا تخت الولد وكل الطاقم بركض معه وسحبوا الجهاز معهم.. وراااحوا عال ICU.

بعد فتره طلعت اتطمن ع الولد.. حكولي أهله "الحمد لله القلب والتنفس رجعن إشتغلن.. بس بضل الدماغ.. ما في نزيف بس خايفين إنه خلايا الدماغ تأثرن من غياب الأكسجين فتره طويله، ومن هون لبكره ببين كل اشي"

واليوم وصلنا الخبر إنه الولد دماغه سليم الحمدلله.. والولد وضعه مستقر وبيتحسن بإذن الله.

طيب كيف صار هيك؟

وكيف رجع؟

قتال الأطباء؟؟!

دمعة الممرضة؟!!

دعواتنا كلنا؟

هو ربنا بس القادر ع كل إشي.. سبحان عظمته وقدرته.

كل الفضل لربنا ثم طاقم الأطباء والممرضين.. اللي أنا شخصيآ لمست فيهم بهالليلة روح الملائكة..

فعلآ أنحني لكم شكرآ وحبآ وإحترامآ وتعظيمآ.. ألف تحية.

#شكرآ_لكم

يوم الإثنين الموافق 22/8/2016 في تمام الساعه العاشرة مساءآ

الطفل هو عامر العزب من "مخيم نور شمس"