قصة فساد بقلم: محمد موسى عساكره

قصة قصيرة بـ"العامية"

2018-09-07 11:56:25 AM

ضيف حلقة اليوم، رجل الاعمال الفلسطيني الشهير، بهيج بهيج..

استاذ بهيج مثل ما بنعرف صاحب أكبر شركات البناء في البلد،

وواضع نظرية الحركة المصرفية الحديثة في الدول النامية

وصاحب ثالث أكبر جامعة خاصة في الشرق الأوسط،

بالإضافة لمشاريع سياحية متعددة وعلى المستوى العالمي للجودة

استاذ بهيج .. احكيلنا عن الرؤيا.. عن البداية.. وعن اول المشوار

- شكرا الك..

حقيقة البداية كانت جدا متواضعة وبعيدة كل البعد عن الوضع الحالي... تخيلي مثلا.. بالمدرسة.. كنت دائما الأخير عالصف.. وبدون استثناء.... كنت كثير كسلان وبحياتي ما درست، وما كنت افهم الرياضيات إطلاقا.... وقضيتها هربان وبلعب بالحارة مع ولاد الشوارع

- ههههه مثل معظم العباقرة..

بقولو اينشتاين و ستيف جوبز و غيرهم من العباقرة كانو يهربو من المدرسة .. كملّ النا .. كيف بعدها تغيرت الامور ؟

- ممممم بالاعدادي كونت عصابتي الاولى

كانت اوسخ عصابة بالبلد .. نضرب الولاد ، و نرمي حجار عالختايرة ، نسرق الدكاكين و نكسر القزاز ..ما كان حدا يطيقنا ..و تخيلي مرة .. سرقنا سيارة جارنا و لسا ما كان عمري 13 سنة .. ههههههه

- الله عليك شو كنت شقي و حكياتك ظراف .. هههههه ..

المهم .. شو صار بعدها بحياتك ؟

- كنت ما بعرف سوق .. دعست رجال كبير ومات

وخفت و هربت خبيت السيارة المسروقه

وضليت أربع أيام برجف و ما طلعت من البيت

وصرت فكر بأمور غريبة ما كانت تخطرلي وقتها ...

- اها .. ووقتها تغيرت حياتك للأبد بعد هالقصة ؟

- لا .. بعد كام يوم نسيت كل شي ورجعت عالحارة

وقضينا صيفية فظيعة انا والزعران .. اشتريت اول مسدس بحياتي .. و عملنا دوري صيد قطط... و كنت الثاني عالدوري ، لانو رفيقي كان سابقني بقطتين.... قمت طخيتو برجلو وربحت انا الدوري..... من احلى صيفيات عمري بقلك .. بس بعدها بالثانوية العامة ، هون دخلت حياتي منحنى جديد

- اي احكيلنا .. شو الحادثة يلي غيرت نظرتك للامور

- فعلا كان في حادثة صغيرة ..

وقت اتحرشت باول بنت قاصر ودخلت سجن الاحداث

كانت زيارة قصيرة، بس تلتها عدة زيارات أطول بعد حوادث التحرش المتعددة..... فترته كوّنت معظم أصدقاء شبابي ، و قضينا أيام لا تنسى

- فعلا طفولة غريبة .. ومنقدر منقول مميزة، نظرا للاختلاف .. والـ .. انو .. بس ... بس أكيد الجامعة كانت ..

- فشل ذريع

الجامعة كانت فشل ذريييع بكل معنى الكلمة،. ما ضل معهد ما تقلعت منه .. وتركت الدراسة طبعا وانزلت عالشغل واتجهت للحياة العملية

- أهاا .. وهون اكتشفت حالك و عشقك للبزنس وانطلقت في مجال المشاريع ؟

- لا لا ..

كمان فشلت فشل ذريع بالشغل ..

طبعا بسبب شخصيتي الحقيرة .. ما كنت حب اخد أوامر من حدا .. فما قدرت اشتغل عند العالم وقررت اشتغل لحالي

بس مثل ما قلتلك .. عقلي مش تجاري اطلاقا وبكره الارقام والحسابات