متابعة الحدث| أمن جامعة النجاح يمنع طالباً من دخول الجامعة بسبب منشور مدح فيه جامعة بيرزيت

الحدث- محمد غفري

أقدم أمن جامعة النجاح الوطنية في مدينة نابلس على منع طالب الإعلام في الجامعة أسامة عرار من دخول الحرم الجامعي، وذلك بسبب منشور له على موقع الفيس بوك قارن فيه بين جامعة النجاح وجامعة بيرزيت بشكل ينحاز فيه للثانية.

الطالب عرار أفاد، بأن هناك قرارا بمنعه من الدخول إلى الجامعة بسبب منشور على الفيس بوك، وأن الأمن الجامعي يطالبه بحذف المنشور والتوقيع تعهد.

وأعلن الطالب عرار رفضه حذف المنشور الذي دونه على صفحته على الفيس بوك يوم السبت الماضي، مؤكداً "انا رفضت كل ذلك وقررت المواجه".

وأضاف عرار، أن "الحذف والتوقيع يعني التنازل عن حقي كصحفي بالكتابه حتى لو كنت هجوميا في طرح القضية فالقانون يكفل لي ذلك"

ولم يتسن لـ"الحدث" الحصول على تعقيب من جامعة النجاح حول القضية.

وهذا نص المنشور حرفياً الذي منع عرار على إثره من دخول جامعة النجاح:

"بين بيرزيت وجامعتي

اليوم كنت بزيارة لجامعة بيرزيت ويا ليتني لم اقدم على هذه الخطوه

دخلت من الباب الأمن وقفني بكل هدوء واحترام ممكن بطاقتك لو سمحت حكتله أنا مش طالب أنا جاي زيارة وبكل هدوء بحكيلي أهلا وسهلا شرفتنا بس بدك تسمحلي لازم حدا من الطلاب يدخلك .

أجا الشب و دخلني ضحكت والشب بحكيلي ليش بتضحك حكتله لا ولا أشي بس تذكرت كيف بندخل أحنا الطلاب جامعتي.

كزدرنا داخل الجامعة والشب بحكيلي يا زلمي مالك هيك بتطلع ع الشوارع والطلاب محسسني أنك مش طالب في جامعة أخره شو أحكيله احكيله أنو هاي الكعدة بنفصل عليه الطالب .احكيلو انو هل مقاعد ممنوعه بالجامعة .احكيله انو لو هاي البنت إلي بدخن بنص الجامعة في جامعتنا كان غير لإجراءات إلي بقوم فيها الأمن الطلاب بطلعوها عاهره ومنحله أخلاقياً

وكملنا الكزدره الشب بحكيلي تعال أعرفك ع الكتل الطلابية ههههههههههههه

يا ريتو ما عرفني ولا أصلاً أطلعت هل زيارة

دخلناع مجموعة شباب الاؤل كان ممثل كتلة طلابية والثاني ممثل كتلة طلابية اخره وثالث من كتلة طلابية مختلفة عنهم وبعض الشباب وبتناقشه عن الوضع السياسي القائم وعن البلد وعن دورهم في تعزيز الوعي الطلابي ودورهم النظالي في الساحه الفلسطينية وتأكيد على الخلافات السياسية لا يجب ان تأثر على دورهم الأساسي كحركة طلابية فأنا حاولت أعمل حالي بفهم وادخل في الحديث بحكي لممثل كتلة طلابية قريب مني انو طيب اذا الجامعة رفضت نشاط الكم وما سمحتلكم بدي اكمل شو بتعمله نط ووقف ممثل كتلة اخره وحكالي لا عاش ولا كان الي بدو يحرمهم يعملو نشاط كنت دحكيله بس انت مش معهم من كتلة اخره بس تذكرت اني مش بالجامعتي وسكتت اما جواب الممثل القريب مني بحكيلي اذا بدو يرتفض النشاط لليش انا كتلة طلابية وكمل انا حركة طلابية نضالية والتحديات والصعوبات هي عملي هههههههههه ضحكت ودمعت من داخلي اصلاً ممثلي الكتل الطلابية في جامعتي مش فاهمين انهم حركات نضالية وحركات تحرر مش حركات خدماتية .

وبعدها دخلنا ع محاضرة بلش الدكتور يشرح صعب جدا احكي هون كيف كان الشرح لكن بأختصار الدكتور ما كان يشرحلهم الفكرة كان يطرح بالموضوع ع الطلاب بالأمثلة الواقعية ويسئلهم شو بتعني هاي و شو بتعني هاي فالنتيجة كانت انو الفكرة وصلت لكل الطلاب بدون ما يحكيها والاهم انهم بلشو يحكو عن كيف اجت الفكرة وليش اجت وشو رح نستفيد منها وامكانية تتطبيقها ع ارض الواقع

وهل اشي بنعكس ع عقلية الطالب مش مهم نحفظ الفكرة مهم نعرف كيف نولد فكرة وكيف نفكر مش بأيش نفكر على عكس الجامعتي الي الاستاذ فيها بطرح نفسه في المواد العلوم الانسانية ومعروف انو هل المجال الموضوعية في صفر والايدلوجية والمدرسة التي ينتمي لها الشخص هي الي بتحكمه بطرح وجهة نظرة لأنو ما في ثوابت فيها و بطرح الاستاذ نفسه على انو الوحيد الي بعطي صح وهو بعطي نفس الدوسية من سنة2012 ولا بقدم اشي جديد فيها

في جامعتي هنالك منظومة متكاملة تعمل على تدمير القيم الوطنية والحرية والتحرر من الاستعمار المتعدد اشكاله والكل بتحمل مسؤولية الطالب والدكتور والادارة والأمن و الكتل الطلابية الي دورها تعزيز الوعي الطلابي وخلق حالة رفض للواقع السيئ لكن للأسف كل الكتل الطلابية تخاذلت عن دورها

أسف على كثرت الحكي بس كان لازم احكي

#جامعة_بيرزيت_أملنا"